Жастар саясаты саласындағы жемқорлықпен күресудің концептуалды тәсілдемелері тақырыбындағы басқарма басшысының м.а. Т.Ысқақовтың авторлық мақаласы

Жемқорлық немесе коррупция, латын тiлiнен corruptio –«сатып алу» дегендi бiлдiредi. Демек, белгiлi бiр лауазымды қызметкердiң жұмыс бабымен тапсырылған мүмкiндiктерiн өз мүдделерi үшiн пайдалану мақсатында жасалған iс-әрекеттер. Дүниежүзiндегi барлық мемлекеттер бұл процесспен күресуде және елiмiзде де бұл орайда талай жұмыстар қолға алынған. Мемлекет басшысы Нұрсұлтан Әбiшұлының саяси көрегендiгiнiң арқасында республикамыз тәуелсiздiгiн алған күннен бастап жүйелi және мақсатты түрде сыбайлас жемқорлыққа қарсы күрестi жүзеге асырып келедi.

Сыбайлас жемқорлыққа қарсы iс-қимылдың iргелi негiздерi «Қазақстан-2050» Стратегиясында, Қазақстан Республикасының 2020 жылға дейiнгi дамудың Стратегиялық жоспарында, Қазақстан Республикасының ұлттық қауiпсiздiгi Стратегиясында, Сыбайлас жемқорлыққа қарсы Қазақстан Республикасының 2015-2025 жылдарға арналған стратегиясынан көрiнiс тапты.

Елбасының «100 нақты қадам» Ұлт жоспарының бес институционалды реформаларын жүзеге асыру бойынша алдағы уақытта сыбайлас жемқорлықпен күресудiң жаңа басымдықтары белгiлендi.

Сыбайлас жемқорлыққа қарсы iс-қимылдың негiздерi «Қазақстан 2020: болашаққа жол» мемлекеттiк жастар саясатының 2020 жылға дейiнгi тұжырымдамасын iске асыру жөнiндегi iс-шаралар жоспарында да көзделген. Басым бағыттар жастар ұйымдарымен бiрлесiп, жасөспiрiмдердiң құқықтық мәдениетiн арттыруға бағытталған iс-шаралар өткiзу, жастар арасында сыбайлас жемқорлыққа қарсы сана-сезiмдi қалыптастыру және дамыту, адал табыс табуды насихаттау болып табылады.

Жастардың жемқорлыққа қарсы мәдениетiн қалыптастыру өте маңызды жұмыс. Балаларға оң моралдiк принциптердi жастайынан бастап жеткiзген дұрыс. Әрине, ең алдымен бала мен жасөспiрiмнiң тәрбиесi отбасынан басталады. Халқымыздың «ұяда не көрсең, ұшқанда соны iлерсiң» деген нақыл сөзi көптi аңғартса керек-тi.Әр азамат үшiн алғашқы әрi ерекше үлгi — ата-анасы, олар өз мысалында дұрыс жол көрсете бiлсе, бала соны алып кетедi. Дегенмен, баланың әлеуметтену үрдiсi балабақшада басталып, мектепте,орта немесе жоғарғы оқу орынының қабырғасында жалғаса бередi. Осы тұста жас азаматтарымыздың арасында жемқорлыққа деген төзбеушiлiк пен жек көру сезiмдерiн қалыптастыруға бiздер де атсалысып жатырмыз.

Жастармен әрқашан еркiн әрi жан-жақты сөйлесу керек. Көзбе-көз кездесiп, жемқорлықтың қоғамымызды қаншалықты уландыратынын жеткiзу қажет.Ақмола облысының жастар саясаты мәселелерi басқармасы бұл жұмысты өз өкiлеттiлiк шеңберiнде атқарып келедi. Жастармен Елбасы жолдауларын, мемлекеттiк бағдарламалар мен үндеулердi жан-жақты түсiндiру мақсатында кездесiп талқылаймыз. Барынша ақпараттық қолдау көрсету мақсатында арнайы ақпараттық материалдар, яғни ақпараттық-насихаттық плакаттар мен брошюраларды дайындап, жастар арасында таратамыз. Заман талабына сай әлеуметтiк желiлерде де өте белсендiмiз, ресми парақшамызда да бұндай материалдарды жариялап отырамыз. Облыстағы жұмыс жасап жатқан 20 Жастар ресурстық орталығы да «Адал жол» жемқорлыққа қарсы марафонына белсендi атсалысты.

Жалпы алғанда жемқорлықпен күрес — ол ауқымды жүйелi тәсiлдеменi талап ететiн жұмыс. Мемлекеттiк деңгейде бұның барлығызаңнамалық негiздi жетiлдiру және жемқорлыққа қарсы бағдарламаларды iске асыру арқылы жүргiзiледi.

Жетiлдiрiлген заңдар мен стандарттар, адами факторды шектейтiн жаңа инновациялық технологиялар арқасында, жастарға мәселен бiлiм беру саласындағы жемқорлыққа қарсы әрекеттердi ұялату керек. Қарапайым мысал: жастар ересек өмiрге деген бастапқы қадамдарынан бастап, яғни студенттiк кезден бастап, пара беру арқылы экзамен тапсыру, оқусыз диплом алу деген ұғымдарды бiлмеу керек. Әдiл еңбекпен, маңдай термен алынған атақ, дипломның ғана құны бар екенiне көз жеткiзiп, бiлiмдi азаматтардың орнын бiлiксiз мамандар алып жатқанын доғару керек. Адал бәсекелестiкке жол берген дұрыс. Бұл айтылғандардың барлығы бүгiнгi күннiң өзiнде орындала бермейдi, демек әлi талай жұмыс атқарған жөн.

Ақмола облысының жастар саясаты мәселелерi басқармасы басшысының
мiндетiн атқарушы,
Ақмола облысы қоғамдық кеңесiнiң мүшесi
Тимур Маратұлы Ысқақов

Мақаланың шыққан күні: 30.03.2018 14:44
Парақтағы соңғы өзгерістер: 30.03.2018 14:44
Қаралым саны: 370